• Anna Simonsen

BRÓÐUR NIKOLAS - framvegis á Kuba

Updated: Feb 13, 2019


Hvør minnist ikki bróður Nikolas, sum vitjaði á fyrsta sinni í 1973. Hann kendi Tom Roberts og hevði hoyrt, at Tom var í Føroyum tað ári, og tí valdi hann at koma til Føroyar.


Tordur Niclasen og Nikolas hugna sær í góðum práti í Havana á Kuba

Henda fyrsta vitjanin gjørdi hann til ein sannan Føroyavin, har hann fekk nógvar góðar vinir, m.a. Zacharias Zachariassen, sála og Mikkjal á Bergi í Klaksvík.


EIN SERSKILT TÆNASTA

Hann varð við tað sama, hóast eingin kendi hann, boðin at tala í fleiri samkomum, og tað var skjótt, at fólkið skilti, at maðurin hevði eina serskilta tænastu og ein líka serskiltan boðskap, væl kryddaður við bæði dramatiskum og góðum upplivingum. Fólk í stórum tali komu til møtini at hoyra Nikolas, eisini fólk frá øðrum samkomum.


DULNEVNI

Nikolas er ættaður og vaksin upp í komunistiska Eystur-Europa, og tað, sum var serligt við honum var, at hann virkaði í londum og støðum har bíbliur og evangeliið var ein brotsgerð undir kalda krígnum. Tí var tað, at hann ferðaðist og virkaði undir dulnevni, fyri ikki beinleiðis at stilla seg út og í ringasta føri verða handtikin.


NÓGV Í FØROYUM

Hann vitjaði javnan í Føroyum upp ígjøgnum sjeytárini og nakað inn í áttatiárini, men seinastu nógvu árini hevur tað verið langt ímillum vitjaninar. Í mong ár hevur hann virkað á Kuba, har hann á hvørjum ári til jólar hevur sent eina jólaheilsan til vinir í Føroyum. Fyri nøkrum árum síðani varð hann raktur av kreft, og hann vitjaði í Føroyum eftir tað, men seinastu tíðina hevur man saknað at hoyra frá honum, og fleiri hava verið stúrin um hann.


TORDUR OG NIKOLAS

Men fyri trettan døgum síðani komu frísk og góð tíðindi av Kuba. Tordur Niclassen, fyrrverandi løgtingsmaður, hevur vitjað á Kuba í hesum døgum, og hann fekk telefonnummarið hjá Nikolas, og tá hann ringdi var Bróður Nikolas í hinum endanum. Teir báðir avtalaðu at hittast, og Tordur skrivaði soleiðis av Kuba á sínum facebookvanga um møti við Nikolas:“Tað var ein serlig løta at møta Bróður Nicolas í Havana. Leingi hava vit roynt at koma í samband við Nikolas uttan tað hevur eydnast. Hann mintist ferðirnar í Føroyum við gleði og takksemi og lat heilsa. Hann er framvegis virkin í verki Harrans. Hann hevur nógv at siga frá. Hetta var ein rík løta!” skrivar Tordur Niclassen.



Sigga, Ragnar, Silvurlín og Jóan Magnus saman við Nikolas

TELEFONNUMMARIÐ

Hjúnini Sigga og Ragnar Olsen Sundstein og Silvurlín og Jóan Magnus Rasmussen hava, samstundis sum tey hava vitjað Tom Roberts á Bahama-oyggjunum, gjørt ein túr til Kuba, har tey gjørdu sær ómak at hitta Nikolas. Tað var Ragnar, sum útvegaði Torduri telefonnummarið hjá Nikolas, tá hann hevði fingið tað upplýst frá Tom Roberts.


Hetta má hava verið ein ómetaliga góð vika fyri Nikolas at hava fingið so nógva føroyska vitjan. Eg eri vísur í, at Nikolas aldri áður hevur havt føroyska vitjan á Kuba - hetta er søguligt - faktisk eru vit bert eitt telefonnummar vekk frá hvørjum øðrum!


Sigga, Ragnar, Silvurlín og Jóan Magnus saman við Tom og Lisu, sum standa í miðjuni


Kristiliga Tíðindatænastan

v/Poul Jóhan Djurhuus

gjaranes@gmail.comTlf: +298 228314

skrivað: pjd, Glyvrar 07.02.2019 Kristiliga tíðindasendingin kann hoyrast annað hvønn mikudag kl. 15 á R7.fo.

Sendingarnar kunnu eisini hoyrast í savninum:

https://r7.fo/news?NewsgroupIds=11

0 views

Elim | Søldarfjarðavegur 7  | Tlf.: +298 441580 | elim@elim.fo